Agèr dimenge 29 de junhsèga se debanèc era 19au corsa Aran per sa lengua que, coma cada an, e organize eth collectiu Lengua Viua. Era corsa d’enguan qu’a agut, ath delà, un caractèr conscientament mès conviviau pr’amor qu’es corsaires an volut partatjar era experiéncia enes places des pòbles en dinnars d’afrairament a on cadun i portaue eth morralet. Qu’an hèt tanben a enténer era reivindicacion de destinar sòs ath desvolopament dera lei der occitan, aranés en Aran e ara immersion lingüistica ena escòla.

En parlament dera Lengua Viua d’enguan, Angelina Casas qu’a arreconeishut eth prètzhèt de mossen Amiell, des companhies de teatre en aranés ‘Era cabana’ e ‘De persones d’Aran entà toti’, e des professors d’escòla que hèn immersion; qu’a tanben arregraït ath Conselh Generau eth sòn prètzhèt ena edicion de libes. Casas qu’a hèt tanplan ua crida ara Generalitat de Catalonha entà que destine es sòs de besonh entà desvolopar era lei der occitan, e as ajuntaments entà qu’er aranés sigue lengua veïculara enes escòles mairaus coma ac ei ja enes escòles publiques.
 
Eth prèmi Lengua Viua d’enguan qu’ei estat autrejat a Manuela Ané peth sòn prètzhèt coma arreviraira, escrivana e promotritz deth teatre en aranés. Ané qu’exprimic eth sòn estonament en un discors fòrça emotiu e contengut. Qu’arreconeishèc qu’arrecéber aguest prèmi e li supausarà ua responsabilitat ahijuda e qu’arregraïc ath collectiu Lengua Viua eth prètzhèt hèt en aqueri quasi vint ans.
 
Eduardo Valdecantos, conselhèr deth Conselh Generau e membre actiu de Lengua Viua, que manifestèc a Jornalet qu’era societat aranesa ei de mès en mès conscienciada e mobilizada. “Non s’agís solament d’un grop de gent, senon un país que tire tà deuant” ce diguèc.
 
Entà un aute an se demore damb illusion era vintau edicion d’aguesta corsa que Lengua Viua a hèt possible pendent dus decènnis. Entà celebrar er anniversari eth collectiu qu’a previst ua hèsta pendent tota era dimenjada pr’amor qu’era escadença b’ac merite.




Josep M. Milla e Ferriòl Macip